गितेवाडी प्राथमिक शाळेतील विद्यार्थ्यांनी घेतली प्रदूषणमुक्त सण समारंभ साजरे करण्याची प्रतिज्ञा -
अहमदनगर - पाथर्डी तालुक्यातील गितेवाडी येथील जिल्हा परिषदेच्या प्राथमिक शाळेतील विद्यार्थी दरवर्षी प्रदूषणमुक्त सण समारंभ साजरे करण्याची प्रतिज्ञा घेऊन त्यानुसार वर्षभर प्रदुषणमुक्त सण समारंभ साजरे करतात.
नुकतेच विद्यार्थ्यांनी फटाकेमुक्त म्हणजे प्रदूषणमुक्त दिवाळी व इतर सण साजरे करण्याची प्रतिज्ञा घेतली आहे.त्यानुसार विद्यार्थी व पालक दरवर्षी फटाके मुक्त दिवाळी साजरी करतात.प्रदूषण हे सर्व सजीवांच्या जीवनास घातक असते .प्रदूषण ही एक फार मोठी जागतिक समस्या आहे .
हवा, पाणी ,अन्न या आपल्या मूलभूत गरजा आहेत. यापैकी एका घटकाचे जरी प्रदूषण झाले तरी आपल्यासह इतर सजीवांच्या जीवनास धोका निर्माण होतो. म्हणून आपल्या सर्वांना आरोग्य संपन्न जीवन जगण्यासाठी प्रदूषण निवारण करणे गरजेचे आहे. त्यामुळे शाळेतील उपक्रमशील शिक्षक तुकाराम अडसूळ व नवनाथ आंधळे हे वेळोवेळी प्रदूषण निवारण बाबत विविध उपक्रम यशस्वीपणे राबवित असतात.यासाठी शिक्षकांच्या मार्गदर्शनाखाली
विद्यार्थी प्रदूषण निवारणबाबत दरवर्षी प्रतिज्ञा घेतात तसेच विविध संदेश तयार करून समाजात जनजागृती करतात.
प्रदूषण निवारण करणे आपल्या सर्वांची सामूहिक जबाबदारी आहे. शालेय जीवनात या जबाबदारीची जाणीव विद्यार्थ्यांमध्ये निर्माण व्हावी , त्यांच्यामध्ये तशी मूल्य रुजावीत म्हणून पर्यावरण संवर्धन आणि प्रदूषण निवारण बाबत विद्यार्थ्यांमध्ये वेळोवेळी जनजागृती करून त्यांना वेळोवेळी तसे मार्गदर्शन केले जाते असे शाळेतील पर्यावरणप्रेमी उपक्रमशील शिक्षक तुकाराम अडसूळ यांनी सांगितले आहे.या उपक्रमातून विद्यार्थ्यांमध्ये प्रदूषण निवारण हे राष्ट्रहिताचे मूल्य रुजविले आहे.त्यामुळे विविध स्तरातून शिक्षकांचे आणि विद्यार्थ्यांचे अभिनंदन होत आहे.
टिप्पण्या
टिप्पणी पोस्ट करा